MONFORTE-ADEGAS MILENARIAS DE VILACHA-MIRADOR DA CAPELA-MONFORTE

MONFORTE-ADEGAS MILENARIAS DE VILACHA-MIRADOR DA CAPELA-MONFORTE

Imprescindible percorrido pola zona máis rural e encantadora da comarca de Monforte, con saída dende a capital da antiga terra dos lemavos -Dactonio, segundo as tablas de Plinio- enmarcada na súa maioría por lameiros extensivos para a cría de vacún e piñeiros de repoboación.

Sombras e chairas preceden a ascensión ata Vilachá, cun desnivel tolerable para o ciclista medio, onde aparecen extraordinarios exemplos da antropoloxía da paisaxe que fixeron posible a adaptación do home ó territorio galego.

As adegas "millenarias" de Vilachá -como reza unha sinalización municipal quizáis agarimosamente esaxerada- dibuxan un pobo ordeado e ideal, limpo e restaurado, de adegas tradicionais agrupadas, que se abren ó público o día primeiro de maio na súa propia feira do viño.

Semiexcavadas no terreo, gardan unha completa isotermia e son un exemplo da enxeñosa adaptabilidade da arquitectura galega ós recursos existentes.

Para rematar as sorpresas, apenas uns quilómetros máis adiante os soterramentos dan paso ós amplos horizontes, e podemos disfrutar da orxía paisaxística da Ribeira Sacra dende o mirador da Capela, equilibradamente deseñado.

Como guinda,no noso percorrido disfrutamos da presencia dunha zorra, e xa preto do retorno a Monforte, case noite, de tres corzas que aproveitaban o grao dunha recente seitura nun campo de Barrio Novo. A foto non é moi boa, pero tendo e conta que está feita cun iphone ó solpor, valla como testimonio.

Un último comentario para a primeira fotografía, un cruceiro ubicado na entrada a Vilachá que, polo que coñecemos, é o priemeiro documentado no que o Cristo posa sorrinte, nunha representación un tanto naif semellante as "cruces de pedra da Bretaña", medio estampa e medio medusa. Excepcional.

Desfrutadea.