As minas de ouro de Brués

San Fiz de Brués é unha das parroquias do ourensán concello de Boborás, na comarca de O Carballiño, que conta con importantes atractivos naturais, etnográficos e históricos. A nosa andada levaranos ata as minas de ouro e arsénico, a Ponte Vella e as termas de Brués, amais de fabulosas fragas e bosques de ribeira nas marxes do troiteiro río Viñao.

- Minas de Brués

Constan de dous sectores, o de Balboa, na aba esquerda do Viñao, e o de Brués, na banda dereita e que será o que nós visitaremos vendo varias bocas de entrada as galerías. Os traballos mineiros semella que comezaron no século XIX, constando explotacións a principios do XX e ata despois da Guerra Civil española.

Están situadas nunha contorna de actividade mineira da época romana e nas proximidades dun castro celta, de xeito que posiblemente xa eran coñecidas entonces. Non quedan restos das instalacións nas que se trataba o mineral para sacar arsénico e algo de ouro (a proporción era de arredor de un kilo de ouro por tonelada de arsénico).

- Ponte Vella de Brués

Esta ponte sobre o río Viñao sitúase no camiño real que comunica as terras de Ribadavia con Pontevedra e Santiago. As referencias máis antigas remóntanse a finais da Idade Media e o vieiro do que forma parte procedía da fortaleza de Cavadoso, seguía por Moldes ata Boborás e desde aí descendía ata esta ponte, para cruzar o río en dirección a fortaleza de Orcellón.

Está formada por dous arcos apuntados e feita con bloques de granito colocados sen argamasa. A superficie de tránsito está feita con lousas de granito e cantos rodados, dun periodo máis recente. Mide 30,5 metros de longo, 3,5 de ancho e una altura media duns 5 metros, tendo os arcos unha luz de 7,20 metros.

Na Idade Media esta ponte situábase entre o Condado de Monterrei e o Condado de Ribadavia, cobrando o Conde de Monterrei un portádego ou pontazgo as persoas que a cruzaban. A beira da ponte aínda pódese ver un monolito co escudo dos Ulloa e as letras MT que fan referencia á casa dos Monterrei.

- Termas de Brués

Atópanse a uns cinco metros do curso do río Viñao, nas proximidades da Ponte das Poldras. Esta ponte foi construída cos restos do antigo castelo de Orcellón e restaurada recentemente conservando as orixinarias piaras de pedra.

Do manancial flúen augas sulfuradas, bicarbonatadas e fluoradas a unha temperatura de 27º C brotando por debaixo dunha pedra de granito. Xa eran coñecidas e usadas polos romanos e actualmente quedan os restos de dous casetos que facían de vestiarios do balneario que existiu a finais do século XX.