De Cedeira a Santo André de Teixido, de ida polos cantís, de volta pola ruta de Ferrol

Fixemos esta ruta un día longo de agosto, cunha parada longa en Santo André para comer, descarnsar e tomar un café xunto ao santo. Ao final era día aínda e puidemos bañarnos na praia de Vilarrube, preto de Cedeira.

A ruta sae do porto de Cedeira, e vai pola ruta dos cantís cara Santo André. Esta parte da ruta por algunha razón está mais sinalizada en sentido contrario, hai que ter algo de ollo. De tódolos xeitos, a que fixemos nós é unha variante de moitas outras parecidas, se vas escollendo diferentes camiños.

No km 10, a partir de punta Balteira, comeza a parte máis complicada tecnicamente. Unha baixada forte por un singletrack de pedras grandes. Con algún descanso de pista algo máis ancha, ata a chegada a Santo André o camiño ten certa dificultade, non apta para novatos. Mesmo a baixada polo que chaman a costa curta nos dous últimos km ata chegar a Santo André, tamén ten a súa complicación.

Para volta a Cedeira queriamos non repetir nada do camiño de ida, polo que fixemos a saída de Santo André pola estrada. O primeiro tramo ten arcén grande, mais despois compartes asfalto cos coches, hai que ter coidado. Fixemos un anaco polo camiño da ruta marcada que fai Ferrol-Santo André, e para chegar a Cedeira polo camiño máis recto fomos buscando pistas e estradas secundarias. A volta son algo menos de kilómetros, con menos desnivel e tecnicamente tamén moito máis sinxela.

Unha ruta moi fermosa e variada, algo dura polo técnico e o acumulado de kilómetros total, pero que paga a pena.