Feísmos? - Agra do Orzán: Paseo entre os Feísmos?

https://youtube.com/watch?v=7bBBGxwJcOg

A praza das Conchiñas é un dos poucos espazos públicos do barrio. O espazo foi salvado da especulación pola veciñanza organizada, que plantou nel unha serie de árbores en sinal de protesta. Unhas árbores que foron cortadas na recente remodelación da praza para construír un aparcadoiro subterráneo. Amelia, veciña do barrio e participante naquela acción reivindicativa, cóntanos a historia.

Esta popular rúa converteuse no centro comercial da zona logo da súa peatonalización, a principios dos 90. Na actualidade, representa a superficie de espazo público máis grande do barrio, con 8.500 m2. Un espazo conseguido logo de anos de reivindicacións veciñais, e non exento de disputas entre a propia veciñanza. A Barcelona foi a primeira rúa peatonalizada nos barrios da Coruña, e ao éxito da iniciativa seguíronlle outras, como a dos Mallos ou A Gaiteira.

Nun barrio con 1m2 de espazo público por cada tres habitantes, moi lonxe dos estándares da lei vixente, hai grande número de patios interiores que poderían ser aproveitados para axudar a paliar este problema. A súa conversión en espazos públicos a determinadas horas do día para ampliar lugares de xogo e esparcimento é unha das propostas incluídas no estudo A Cidade dos Barrios, premiado polo Colexio Oficial de Arquitectos de Galicia.

O centro Ágora supuxo a creación do primeiro centro sociocultural público do barrio. A pesar da calidade das súas instalacións, a súa localización, fóra do núcleo do barrio debido á falta de espazo neste, supuxo certa deslocalización da oferta cultural e unha oportunidade perdida para dinamizar o distrito.

Imaxe: Diariodesign.com

https://youtube.com/watch?v=mdQpbmHf4GE

O lugar da Agramela, na parroquia de San Pedro de Visma, é un dos poucos espazos do municipio da Coruña onde os usos rurais da terra aínda se manteñen. Unha realidade ameazada por un polígono de vivendas.

https://youtube.com/watch?v=MDsV9WsjHrg

Na Agra do Orzán, barrio cunha alta densidade de poboación e carencias de espazo público, existen máis de 30.000 m2 sen edificar, encerrados entre muros e descoñecidos para boa parte dos veciños.

En varias rúas da Agra do Orzán aínda se pode observar a factura das primeiras casas do barrio. As edificacións eran de planta baixa ou de dúas plantas e contaban con espazos de horta. Hoxe, as casas de aqueles que non quixeron vender quedaron enterradas entre grandes bloques, con dificultades mesmo para recibir a luz do sol. Fican como testemuña de que as cousas se puideron facer doutro xeito.

Nos mapas antigos, a cidade da Coruña aparece representada en moitas ocasións coas aspas dun muíño de vento. Estas construcións moían o trigo que se cultivaba na zona e que logo era vendido na praza da Fariña (hoxe praza de Azcárraga).

O último dos muíños de vento en ser derrubado foi o da Agramela, que xa estaba alí, no mínimo, en 1859. Foi destruído no ano 84 por ser un estorbo para o tráfico e para a construción. No lugar, xunto á praza das Conchiñas, hoxe hai máis edificios. As pedras do muíño foron depositadas no parque de Santa Margarida, onde pasaron case 30 anos. Hoxe descansan nun almacén municipal.

Imaxe: La Voz del Agra