Litoral da Pobra a Ribeira

Este percorrido polo litoral norte da ría de Arousa, entre a Pobra do Caramiñal e Santa Uxía de Ribeira (ou Riveira), farémolo procurando sempre este mar tranquilo que baña praias de fina area.
A andaina comeza n´A Pobra, terra adoptiva de Valle-Inclán, a carón da súa casa-museo na Torre de Bermúdez. Enfilando polo paseo da praia do Areal chegamos a Xobre, onde vemos a súa igrexa e casa reitoral e aquí afastámonos da costa para ir ao lugar de Cabío, baixando de novo ao litoral por un sombrizo camiño ata a praia nudista de Agronovo.
Ao chegar ao campo de fútbol, imos pola parte dabaixo xa que aquí conectamos cunha pasarela de madeira que asoma sobre a praia de Cabío e nos leva ata a de Lombiña. Do piñeiral da súa punta pasamos ao areal de A Illa e pisamos outra pasarela que vai ata a praia d´A Corna, que conta cunha boa área de lecer a sombra duns piñeiros. Estamos as portas de Palmeira e xa no porto temos o monumento ao emigrante sobre un mirador. Cun pequeno desvío polas estreitas rúas iremos ata a igrexa neoclásica de San Pedro, na parte alta da poboación.
Pasamos pola praia de Insuela e bordeando a súa punta poñémonos no pequeno e recollido areal do río Azor, separado da longa e equipada praia de Coroso por un piñeiral.
De remate avanzamos polo paseo marítimo e zona portuaria ata o posto de información turística de Santa Uxía de Ribeira, onde acabamos.
O roteiro non está sinalizado mais non debería presentar dificultade para facelo sen GPS.