Meis - Río Umia -Ponte Arnelas

Este é un percorrido moi cómodo e indicado para ir collendo fondo e prepararnos para camiñadas máis duras.
Ó iniciar o paseo imos pola beira do río San Martiño e sorprenderanos a cantidade de muiños moi ben restaurados que atoparemos todo o camiño, e agocha a sorpresa do petroglifo que podedes ver ( ou imaxinar) na fotografía da "pedra".
Atravesaremos unha estrada local para atoparnos co río Umia que, como xa está no seu curso baixo e a poucos quilómetros da súa desembocadura na ría de Arousa, vese influido polas mareas, facéndose visibles a pleamar e a baixamar.
Este paseo é común có Camiño de Santiago, e é un dos meus paseos favoritos porque sempre me sorprenden os animáis que atopamos nel. Se te paras a observar o ceo cando o sol está alto, case seguro que verás permanecer case estático e a pouca altura do chan a un lagarteiro ou a un miñato disposto a cobrarse unha presa no medio dun campo.
No outono sempre hai garzas nas augas someras, e corvos mariños nos depósitos de area que se forman no medio do rió.
Este paseo de hoxe ofreceunos unha sorpresa moi especial: un merlo rieiro e ¡ deixouse fotografar!.