Sendeiro Local de Oia (Vigo)

Este percorrido comenza no parque forestal de San Miguel de Oia (non confundilo con Santa María de Oia) e está sinalizado coas marcas branquiazuis dos sendeiros locais. Desde moitos puntos do seu traxecto poderemos ter boas vistas sobre o litoral vigués, a ría e as illas Cies.

Na páxina web lemos:

“O Sendeiro Local de Oia é o último dos trazados e circula polo tramo alto dos montes xestionados con moita dedicación por parte dos membros da Comunidade de montes de Oia. Combinan os ingredientes propios dun monte periurbano: espazos de uso social, como o Parque forestal, por certo moi concorrido, con espazos de intensa xestión forestal co propósito de acadar a sostenibilidade difícil de lograr en comunidades de reducido tamaño. No traxecto, que coincide en parte coa Senda panorámica de Vigo (GR-53), pódese acceder a miradoiros naturais que coroan a Ría de Vigo, particularmente o localizado ao carón da Antena de Salvamento Marítimo. Tamén é de salientar o punto máis alto do sendeiro, na Fonte do Sapo, que ten a particularidade de ser punto de encontro coas Comunidades de montes de Coruxo e de Saiáns, así como coa de Camos, en Nigrán.”